୮୦ ଫୁଟ ବୋରୱେଲ ମଧ୍ୟରେ ଫସିଥିବା ରାହୁଲର ଉଦ୍ଧାର ଅପରେସନକୁ ନେଇ ଏବେ ସାରା ଦେଶରେ ଚର୍ଚ୍ଚା ଲାଗି ରହିଛି । ଗତ ଶୁକ୍ରବାର ଦିନ ରାହୁଲ ଖେଳୁଥିବା ବେଳେ ଗଭୀର ବୋରୱେଲ ଗର୍ତ୍ତ ମଧ୍ୟକୁ ଖସି ପଡିଥିଲା । ପ୍ରଥମେ ଗ୍ରାମବାସୀ ତାକୁ ଉଦ୍ଧାର କରିବା ପାଇଁ ଚେଷ୍ଟା କରିଥିଲେ କିନ୍ତୁ ବିଫଳ ହୋଇଥିଲେ । ଏହାପରେ ସ୍ଥାନୀୟ ପ୍ରଶାସନ ଓ ଜିଲ୍ଲା ଅଧିକାରୀ ଏହି ଘଟଣା ସମ୍ପର୍କରେ ସୂଚନା ପାଇବା ପରେ ରାହୁଲଙ୍କୁ ଉଦ୍ଧାର କରିବାକୁ ଆଗେଇ ଆସିଥିଲେ ।
ରାହୁଲର ରେସ୍କ୍ଯୁ ଅପରେସନ ପାଇଁ ଆବଶ୍ଯକୀୟ ସମସ୍ତ ପଦକ୍ଷେପ ନେଇଥିଲେ ଛତିଶଗଡ ସରକାର । ରାହୁଲ କଥା କହିବା ଓ ଶୁଣିବାରେ ସମସ୍ଯା ରହିଛି । ଯେଉଁଥି ପାଇଁ ତାଙ୍କ ମାନସିକ ବିକାଶ ମଧ୍ୟ ଧୀରେ ଧୀରେ ହେଉଥିବା କଥା ତାଙ୍କ ଘରଲୋକ କହିଥିଲେ । କିନ୍ତୁ ଏହି ଦିବ୍ୟାଙ୍ଗ ଶକ୍ତି ହିଁ ଆଜି ରାହୁଲଙ୍କୁ ସୁରକ୍ଷିତ ୮୦ ଫୁଟ ଗର୍ତ୍ତ ମଧ୍ୟରୁ ଜୀବିତ ବାହାରିବାରେ ସାହାଯ୍ୟ କରିଛି କହିଲେ ଭୁଲ ହେବନାହିଁ । ବଡ ଲୋକଟିଏ ମଧ୍ୟ ଏଭଳି ପରିସ୍ଥିତିରେ ସାହାସ ହାରିଦେବ ।
କିନ୍ତୁ ମାତ୍ର ୧୦ ବର୍ଷର ରାହୁଲ କିଭଳି ଭାବେ ଧୈର୍ଯ୍ୟ ଧରି ସାହସର ସହ ପରିସ୍ଥିତିକୁ ସାମ୍ନା କରିଥିଲେ ତାହା ସମସ୍ତଙ୍କୁ ଆଶ୍ଚର୍ଯ୍ୟ କରୁଛି । ରାହୁଲର ଉଦ୍ଧାର କାର୍ଯ୍ୟରେ ୫ଦିନ ଲାଗି ଯାଇଥିବାରୁ ତାଙ୍କ ସ୍ୱାସ୍ଥ୍ୟକୁ ନେଇ ଚିନ୍ତା ବଢିଥିଲା । ତାଙ୍କ ପରିବାର ମଧ୍ୟ ପୁଅକୁ ଭିଏଲସି କ୍ୟାମେରା ମାଧ୍ୟମରେ ଦେଖୁଥିଲେ ଓ ଶୀଘ୍ର ତାକୁ କୋଳରେ ପାଇବାକୁ ଅପେକ୍ଷା କରି ବସିଥିଲେ ।
ପୁଅକୁ ଏଭଳି ସ୍ଥିତିରେ ଦେଖି ବାପାମା’ଙ୍କ ମନ କେମିତି ହେଉଥିବ ଆପଣ ନିଜେ ଚିନ୍ତା କରି ପାରୁଥିବେ । ତେବେ ରାହୁଲ ଉଦ୍ଧାର ହେବା ପରେ ତାଙ୍କ ମାଆଙ୍କ ପ୍ରତିକ୍ରିୟା ମିଳିଛି । ରାହୁଲ ବାହାରକୁ ଆସିବା ପରେ ଓ ତାକୁ ଦେଖିବା ପରେ ତାଙ୍କ ଖୁସିର ସୀମା କେତେ ଥିଲା ସେ ନିଜେ ମଧ୍ୟ ବର୍ଣ୍ଣନା କରିପାରିବେ ନାହିଁ ବୋଲି କହିଛନ୍ତି । ପୁଅ ପାଇଁ ସେମାନେ ୫ଦିନ ଧରି ଭଲଭାବେ ଖାଇ ନାହାନ୍ତି କି ଶୋଇ ନାହାନ୍ତି ।
କିନ୍ତୁ ରାମ, ଲକ୍ଷ୍ମଣ ବନବାସରୁ ଫେରିବା ଭଳି ତାଙ୍କ ପୁଅ ନୂଆ ଜୀବନ ପାଇ ତାଙ୍କ କୋଳକୁ ଫେରି ଆସିଛି ବୋଲି ସେ କହିଛନ୍ତି । ରାହୁଲଙ୍କୁ ଦେଖିବା ପରେ ତାଙ୍କୁ ଭୋକ ମଧ୍ୟ ହେଉନାହିଁ । ଖୁସିରେ ତାଙ୍କ ପେଟ ଭରିଯାଇଛି ବୋଲି ସେ କହିଛନ୍ତି । ପୁଅ ରାହୁଲର ଉଦ୍ଧାର ପରେ ତାଙ୍କ ପୁରା ପରିବାରର ଖୁସିର କୌଣସି ଠିକଣା ନଥିବା କହିଛନ୍ତି ରାହୁଲଙ୍କ ମାଆ । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।
